أبيات شعر رائعة

صار ثمن اسنين بس نرجع گري.. والحكومه اتبيع بينه وتشتري.. يا هو التكضّه حرامي وسرسري.. اوجوه سوده والحقد ماليهه ]..! –

كافي جيبو السلّة ما نريد العنب
بعد ما يلبس اكلاوات الشعب
هاي ثمن اسنين جم بوري انضرب
حاير وصفنات بس گاضيهه

نوري باشه المالكي كافي قمع
سِمْجتك خاست ولا بيهه نفع
لا تحاول .. احنه عضّينه الصِبع
بعد بالعبّاس مانسويهه

يا حكومه الهاي بس بيهه حجي
خلّصتهه اويانه تطبير وبجي
تاكل ابروس اليتامه وتنتجي
طاح حظ الگال زينه اشبيهه

كلهه شبعت بُوك واثريد ودلال
عمّي حقه الجان ما يلبس انعال
گام بالدولار يحجي وبالريال
اشلون دنيه الهاذ لاعِب بيهه

نوري باشه المالكي بُرو بُرو
بعد لِبْس الصوف لابسّلي فرو
الجرو اشما لبّسوه يبقه جرو
عود باجر گول ما ننطيهه

يا حكومه اتريد من عدهه تگوم
انته والمثلك بعد ما له لزوم
لو الدهر كِلّه إلك مو مِيْت يوم
ما تِرگعّهه ولا اداويهه

الشعب تدريه امفتح باللبن
بعد ما تعبر عليه هاي الفِتن
صار ثمن اسنين ما عنده وطن
وروحه فوك اجفوفه امخلّيهه

نوري باشه المالكي رايدله فرصه
يعتقدهه اتفضّ بزيادة الحِصّه
هاذ طعمك خلّه يتلولح ابشصّه
الگاع ظلمه ودمنه ليضوّيهه

نوري باشه المالكي خلصت كروته
والعراقي الجان ساكت عِله صوته
اليريد ايعيش عمره ابطن حوته
خلّه .. ما يدري شنو تاليهه

گلنه بلكت .. وانتخبناكم .. نعم
وما دخل بجيوبنه غير الندم
إيد لاختارتكم ابجرّة قلم
بالف عطّابه وعلي انجوّيهه

گلنه بلكت هلحكومه تنصلح
وانتظرنه ايغزر اشويه الملح
تالي خُبّاز العِشه وهم ما يصِح
والبطن لو تحجي انحجّيهه

نوري باشه المالكي لزگتك لزگه
تره لو ثار الشعب حلگك يشگه
شرطة العندك هذوله ابيش حِگه
من تِشب النار شيطفيهه

هِيّه دوله دولتك فد مندله
بس تربّي اكروش كلهه امدندله
گلي ذيل الجلب ياهو ايعدله
طبع بيهه اللغف مو بيديهه

نوري باشه المالكي احسابك وصل
اشگد ثرمت ابروس هالوادم بصل
اهواي بيك اشگوك ما اتكفي الوصل
لا بعد ما تِلّحك اتغطيهه

صار ثمن اسنين بس نرجع گري
والحكومه اتبيع بينه وتشتري
يا هو التكضّه حرامي وسرسري
اوجوه سوده والحقد ماليهه

نوري باشه المالكي ماكل تِبن
من شهر لليوم ما غمّض جفن
من تجي الجمعه يصخّن لو يون
وتمشي بطنه من يمر طاريهه

صار ثمن اسنين بس تلفط لفط
والشعب جوعان جدّه منسمط
شفطت النفطات امريكه شفط
والحكومه اتبوّس ابرجليهه

ثورة العشرين بالجمعه تِشِع
ما يخوّفنه اضطهاد ولا قمع
سِنّه شيعه انحوم واحِدنه سبع
إيد وحده ومحّد ايلاويهه‬